02/11/2024
На натпреварот од Премиер лигата помеѓу Ливерпул и Брајтон присуствуваа нашите членови Ивана Георгиевска од Битола и Лидија Јовановска од Скопје.
Во прилог кратка фото репортажа и збор два околу Liverpool FC ...
OLSC Macedonia: Зошто Liverpool FC и како започна да навиваш за клубот ?
Лидија: Навивам за Ливерпул од 2012-та година, поточно од финалето во ФА купот против Челзи. Всушност, пред тој натпревар не следев толку активно фудбал, но бев поканета на заедничко гледање на натпреварот во Ајриш Паб во Скопје каде што тогаш се собираа членови на навивачкиот клуб. Откако одекна You’ll never walk alone и сите навивачи едногласно ја испеаа, ми надојдоа солзи во очите и почувствував дека тоа е тоа. Иако изгубивме, веќе не беше спорно за кого навивам.
OLSC Macedonia: Омилен играч , омилена генерација и омилен тренер ?
Ивана: Како навивач од ерата на Клоп под кој што Ливерпул го постигна најголемиот успех во последните 30 години, немам друг избор освен да речам дека омилен тренер ми е Јурген Клоп кој е несомнено еден од најхаризматичните тренери во историјата на фудбалот, човек кој што од првиот момент допре до срцата на навивачите.
Секако, позади успехот на Ливерпул стои не само тој и играчите, но и целиот тренерски тим и управата кои што успеаа да направат одлична синергија помеѓу сите елементи и постигнаа одличен успех кој се надеваме дека ќе продолжи. А како омилен играч ќе го издвојам Ван Дајк, одличен во одбрана, столб на тимот.
OLSC Macedonia: Натпреварот кој го следевте , Liverpool - Brighton...
Лидија: Влезници набавивме преку OLSC Macedonia. Голема благодарност до фан клубот кој ни помогна во процесот. Натпреварот заврши 2:1 за Ливерпул, но на полувреме Ливерпул изненадно губеа 0:1. Првото полувреме беше потивко бидејќи Ливерпул не успеаа да воспостават контрола и да се доближат до голот на Брајтон. Но, околу 60-тата минута по голот на Гакпо, Енфилд се дигна на нозе. Атмосферата беше одлична и се наговестуваше подобра игра кога атмосферата ги понесе играчите. Неколку минути подоцна Салах даде одличен гол по кој што Енфилд еруптираше и пресвртот беше потврден.
Дури и Слот изјави по натпреварот дека тоа била најдобрата атмосфера на Енфилд која ја има доживеано. Иако играта во првиот дел не беше сјајна, Слот направи одлични тактички измени во вториот дел и победата беше целосно заслужена.
OLSC Macedonia: Arne Slot и една нова етапа во историјата на Liverpool. Кои се твоите очекувања и твоето мислење за новата сезона ?
Ивана: Ова прашање ќе беше многу потешко да се одговори пред да почне сезоната. Но, морам да кажам дека Арне Слот изненади екстремно позитивно. Уште од првиот натпревар беше јасно дека неговиот стил на игра е многу посталожен и преферира контрола пред хаос - нешто што беше многу присутно под Клоп. Иако тимот не е постојано забавен за гледање, стилот вродува резултати преку многу подобрена и стабилна одбрана и користење на шансите во нападот.
Во однос на наследениот состав од Клоп, би рекла дека многу играчи го играат својот најдобар фудбал сега под Слот, меѓу кои - Конате, Гравенберх, Џонс, Диаз, Салах, Гакпо па дури и Нуњез. Очекувам Ливерпул да бидат во борба за Премиер лигата и со оглед на ослабената игра кај главните конкуренти Арсенал и Сити, мислам дека и имаат најдобри шанси да ја освојат. Секако очекувам да се конкурентни и во сите други натпреварувања.
YNWA!
